John Daly snýr aftur eftir keppnisbann

Sex mánaða keppnisbanni golfarans skrautlega, John Daly, í PGA-mótaröðinni er lokið og kappinn mun spila aftur golf í Bandaríkjunum eftir þrjár vikur.

Daly var dæmdur í bannið vegna margra atvika utan vallar sem þóttu setja neikvæða ímynd á golfíþróttina.

Steininn tók þó úr þegar í umferð fór mynd af honum haugdrukknum í appelsínugulum fangagalla þar sem hann var að sofa úr sér í fangelsi í Norður Karólínu-fylki.

Daly lét bannið ekki aftra sér frá því að spila golf en hann hefur spilað út um allan heim og þar á meðal í einn mánuð í Evrópu.

Daly hefur ekki unnið mót á PGA-mótaröðinni í fimm ár.