Moratti: Ákvörðun um framtíð Ibrahimovic tekin á næstu dögum

Massimo Moratti forseti Inter segir að ekkert liggi fyrir að svo stöddu um framtíð Zlatan Ibrahimovic hjá félaginu en ákvörðun verði tekin á allra næstu dögum.

„Við munum taka ákvörðun um Ibra á næstu dögum. Við erum alveg rólegir yfir þessu. Við erum með sterkan leikmannahóp og Ibrahimovic er hluti af honum og hefur staðið sig frábærlega fyrir félagið," segir Moratti sem viðurkennir þó að fjárhagslegt umhverfi Inter sé ekki jafn gott og oft áður líkt og hjá öðrum félögum út af kreppunni.

„Kreppan hefur auðvitað áhrif en við þurfum hvorki að selja né kaupa frekar en við viljum. Staðan er ekki þannig. Við skulum sjá hvað gerist á markaðnum og við spilum þetta eftir eyranu. Við viljum halda áfram að keppa um þau verðlaun sem eru í boði," segir Moratti í samtali við sjónvarpsstöð Inter.