Cesar neitar því að vera á leiðinni til United

Sögusagnir í ítölskum fjölmiðlum um helgina gáfu í skyn að markvörðurinn Julio Cesar hjá Inter væri líklega á leiðinni til Manchester United þegar félagaskiptaglugginn í janúar opnar.

Orðrómurinn komst upphaflega á kreik þegar eiginkona Cesar uppljóstraði í viðtali við ítalska fjölmiðla að stórt félag hafi áhuga á að fá markvörðinn í sínar raðir.

„Ég neita alfarið að ég sé á förum frá Inter. Ég er samningsbundinn félaginu og viðræður um nýjan samning eru þegar komnar á skrið," er haft eftir Cesar en Marco Branca, yfirmaður knattspyrnumála hjá Inter, hefur staðfest að Cesar sé nálægt því að framlengja við Inter til ársins 2012.