Mourinho: Hef ekki rætt við Adriano

Jose Mourinho hefur ekki rætt við Brasilíumanninn Adriano síðan sá síðarnefndi lýsti því yfir að hann ætlaði að taka sér frí frá fótbolta.

Adriano er í heimalandi sínu og er talinn glíma við þunglyndi. Hann sagði í samtali við fjölmiðla í Brasilíu að hann ætlaði að setja heilsu sína í forgang og því ætlaði hann að hætta í fótbolta - í bili að minnsta kosti.

„Ég vil eiginlega ekki ræða þetta," sagði Mourinho spurður um málið. „Inter hefur gert allt sem í sínu valdi stendur til að hjálpa honum, jafnvel áður en ég kom til félagsins. Allir hafa reynt að hjálpa - ég, leikmenn og forsetinn."

„Við skulum sjá hvað gerist. Aðalmálið er að hann sé hamingjusamur. Ég hef ekki rætt við hann ennþá. Ég mun fá tækifæri til að ræða við hann fljótlega svo við getum reynt að koma til botns í þessu máli."