Danska ríkisútvarpið segir upp 40 stjórnendum

Það var stjórn DR sem tók þessa ákvöðrun í gærkvöldi að því er segir í dönskum fjölmiðlum. Um er að ræða að fimmta hver stjórnandi DR fær uppsagnarbréf. Samhliða þessu verða gerðar verulegar breytingar á skipulagi DR og það einfaldað til muna.

Michael Christiansen útvarpsstjóri DR segir í tilkynningu um breytingarnar að nýtt húsnæði stofnunarinnar sé tilbúið, náðst hafi tök á efnahag DR og nú geti allir starfsmennirnir einbeitt sér að styrkja framleiðsluna fyrir dagskrár DR. „Ég er viss um að nýtt skipulag muni hafa þetta í för með sér," segir Christiansen.

DR verður skipt upp í fjórar deildir og nýr deildarstjóri ráðinn að hverri þeirra. Þeir munu svo aftur taka sæti í yfirstjórn DR. Deildirnar munu heita DR Nyheder, DR Oplysning, DR Kultur og DR Danmark.