Mourinho sannfærður um að Ibrahimovic verði áfram hjá Inter

Miklar vangaveltur hafa verið síðustu daga í fjölmiðlum út af framherjanum Zlatan Ibrahimovic sem sagður er vilja takast á við nýjar áskoranir og komast burt frá Inter og ítalska boltanum.

Knattspyrnustjórinn José Mourinho hjá Inter er þó sannfærður um að kappinn verði áfram á Giuseppe Meazza leikvanginum á næstu leiktíð.

„Ég veit hvernig leikmannamarkaðurinn virkar og hvernig umboðsmenn vinna og ég er því alveg rólegur yfir stöðu mála hjá Ibrahimovic. Ég trúi því að hann verði áfram hjá Inter á næsta keppnistímabili. Ég trúi því vegna þess að enginn er búinn að segja mér að það verði ekki þannig," segir Mourinho.

Ibrahimovic sjálfur hefur lítið viljað tjá sig um málið en hann kvaðst þó vita vel sjálfur hvar hann myndi spila á næstu leiktíð.

„Framtíð mín? Ég veit vel hvar ég mun spila á næstu leiktíð, en ég ætla að halda því fyrir sjálfan mig," sagði Ibrahimovic á blaðamannafundu fyrir leik með sænska landsliðinu á dögunum.