Pau Gasol kvartar undan Dwight Howard

Orlando Magic minnkaði muninn í 2-1 í úrslitaeinvígi sínu við LA Lakers í nótt með 108-104 sigri á heimavelli sínum.

Hinn kröftugi Dwight Howard fór mikinn fyrir Orlando og skoraði 21 stig og tók 14 fráköst en Kobe Bryant skoraði 31 stig fyrir LA Lakers og Pau Gasol var með 23.

Spánverjinn Gasol kvartaði undan því að Howard hafi fengið að leika harðari leik á heimavelli Orlando en í fyrstu tveimur leikjum einvígisins.

„Hann fékk að spila miklu fastar og mun líkamlegari leik en í fyrstu leikjunum. Það voru nokkrir hlutir sem hann fékk að gera á heimavelli sínum sem honum var refsað fyrir í fyrri leikjunum. En það er ekkert sem hægt er að gera í því. Ég held bara áfram að berjast," segir Gasol.