Arena á von á Beckham í næstu viku

Bruce Arena, þjálfari LA Galaxy, segist eiga von á David Beckham til æfinga með liði sínu í næstu viku.

David Beckham er sem kunnugt er á lánssamningi hjá AC Milan á Ítalíu en samningurinn rennur út þann 9. mars næstkomandi.

Beckham hefur mikinn hug á að vera áfram á Ítalíu og forráðamenn Milan vilja halda honum, en þrátt fyrir tíðar fréttir af samningaviðræðum milli félaganna undanfarið, virðist litlu miða í þeim efnum.

"Því hefur aldrei verið haldið fram að hann væri á förum frá Galaxy. Enginn hefur sagt að hann væri að fara. Við höfum aldrei sagt það. Við höfum lánað menn frá félaginu og eigum von á að sjá þá aftur 9. mars. Við eigum von á að sjá Landon Donovan (hjá Bayern Munchen) aftur í næstu viku og Beckham líka. Ef eitthvað breytist í þeim efnum, munum við bregðast við því á viðeigandi hátt," sagði Arena í samtali við LA Times.