Ranieri og Moratti komnir í hár saman

Það var heitt í kolunum í leik Inter og Roma í ítalska boltanum í gær og mönnum var enn heitt í hamsi eftir leikinn.

Claudio Ranieri, þjálfari Roma, var afar ósáttur við leikmenn Inter sem hann sagði vera ofbeldisfulla og hafa viljandi meitt sína menn.

Daniele De Rossi fór kinnbeinsbrotinn af velli eftir að hafa fengið olnbogann á Patrick Vieira í andlitið.

Massimo Moratti, forseti Inter, var ekki ánægður með orð Ranieris og svarar honum fullum hálsi í dag.

„Ég heyrði hvað Ranieri sagði og mér finnst þessi skammarræða hans furðuleg. Ásakanir hans eru ekki fallegar því hann er að reyna að láta okkur líta út fyrir að vera eitthvað sem við erum ekki," sagði Moratti.

„Mér fannst við ekki leika gróft og mér fannst úrslitin heldur ekki ósanngjörn miðað við hvernig leikurinn spilaðist."