Jafntefli hjá Þór/KA og Stjörnunni á Akureyri

Þór/KA og Stjarnan mættust í sannkölluðum toppslag í Pepsi-deild kvenna á Akureyri í kvöld en niðurstaðan var 1-1 jafntefli.

Rakel kom Þór/KA yfir snemma leiks en Inga Birna Friðjónsdóttir jafnaði fyrir Stjörnuna þegar um tíu mínútur lifðu leiks og þar við sat.

Akureyrarkonur voru sterkari aðilinn í fyrri hálfleik en Stjörnustúlkur komu sterkar inn í síðari hálfleik og náðu að jafna leikinn með marki Ingu Birnu áður en Arna Sif Ásgrímsdóttir fékk að líta sitt annað gula spjald og þar með rautt.

Þrátt fyrir það fékk Þór/KA kjörið tækifæri til þess að klára leikinn í blálokin þegar Vesna Smiljkovic fékk dauðafæri en Sandra Sigurðardóttir kom gestunum til bjargar með markvörslu í landsliðsklassa.

Bæði liðin þurftu nauðsynlega á sigri að halda í kvöld í toppbaráttunni við Val og Breiðablik og 1-1 jafnteflið því skammgóður vermir.