Grant: Áttum skilið að ná jafntefli

Avram Grant, stjóri Chelsea, segir að hans menn hafi átt skilið að ná jafntefli gegn Liverpool í fyrri leik liðanna í undanúrslitum Meistaradeildarinnar í kvöld.

Liverpool virtist hafa landað sigrinum með marki Dirk Kuyt í fyrri hálfleik, en sjálfsmark John Arne Riise jafnaði metin fyrir Chelsea í uppbótartíma.

"Við áttum eþtta skilið. Þetta var jafn leikur og við sáum ekki mörg tækifæri. Drogba hefði ef til vill átt að fá víti og svo fékk Malouda færi í síðari hálfleiknum," sagði Grant.

"Mörkin komu bæði eftir varnarmistök. Við stjórnuðum leiknum en fengum avo á okkur mark eftir mistök. Í síðari hálfleiknum gerðum við svo breytingar og náðum góðum úrslitum. Það er gott að fara með 1-1 jafntefli á heimavöllinn, en það verður erfiður leikur alveg eins og þessi," sagði Grant við Sky Sports í kvöld.