Sagan ekki á bandi Boston

Boston Celtics og Cleveland Cavaliers mætast í kvöld í hreinum úrslitaleik um sæti í úrslitum Austurdeildarinnar í NBA. Leikurinn verður sýndur beint á Stöð 2 Sport á besta tíma, eða klukkan 19:30.

Boston var með langbesta árangur allra liða í deildinni í vetur - 66 sigra og aðeins 16 töp, en hefur verið í vandræðum á útivöllum í úrslitakeppninni.

Liðið vann Atlanta naumlega í fyrstu umferðinni 4-3 þar sem úrslitin réðust í oddaleik í Boston. Nú er komin upp sama staða í einvígi liðsins gegn LeBron James og félögum í Cleveland þar sem staðan er jöfn 3-3.

Liðið sem hefur betur í kvöld mætir Detroit Pistons í úrslitum Austurdeildarinnar, en nokkuð er síðan Pistons kláraði einvígi sitt við Orlando 4-1 og því verða leikmenn liðsins vel hvíldir fyrir átökin gegn Boston eða Cleveland.

Blaðamenn í Detroit horfa frekar til Boston sem mótherja í næstu umferð og grófu upp áhugaverða staðreynd úr sögubókunum fyrir sjötta leik Boston gegn Cleveland.

Þannig hefur engu liði sem tapað hefur fyrstu fimm útileikjum sínum í úrslitakeppninni tekist að verða NBA meistari, en Boston hefur tapað fyrstu sex útileikjunum sínum eftir að það lá í Cleveland á föstudagskvöldið.

Það er því ljóst að Boston-menn verða að brjóta blað í sögunni ef þeir ætla sér að landa meistaratitlinum - í það minnsta að vinna áttunda heimaleik sinn í röð í úrslitakeppninni í kvöld.

Þeir geta þó huggað sig við þá staðreynd að heimaliðin hafa unnið 21 af 23 leikjum í annari umferðinni til þessa, en aðeins Lakers og Pistons hafa unnið útileik.

Aðeins einu öðru einvígi í annari umferð úrslitakeppninnar er ólokið, en það klárast annað kvöld þegar New Orleans og San Antonio mætast í sjöunda leik í New Orleans.

Sá leikur verður líka sýndur beint á Stöð 2 Sport og hefst um klukkan 00:30 eftir miðnætti.