Mayweather er heitur fyrir Wembley

Talsmaður hins ósigraða Floyd Mayweather segir hann vera að íhuga það alvarlega að mæta Ricky Hatton öðru sinni - í þetta sinn á Wembley í Lundúnum næsta vor.

Mayweather vann nokkuð afgerandi sigur í frægum bardaga þeirra í Las Vegas í fyrra en mikið hefur verið rætt um að etja þeim saman á ný.

Hatton á næst að berjast við Mexíkóann Juan Lazcano á borgarleikvangnum í Manchester þann 24. maí nk.

Hatton er ekki sáttur við tapið fyrir Mayweather í desember og vill meina að dómarinn Joe Cortez hafi aldrei leyft sér að berjast með sínum stíl. Þeir voru margir sem tóku undir gagnrýni Hatton og vildu hreinlega meina að dómarinn hefði eyðilagt bardagann.