Ísland vann Slóvakíu 2-1

Vináttulandsleik Slóvakíu og Íslands er lokið. Ísland vann góðan 2-1 sigur ytra með mörkum frá Gunnari Heiðari Þorvaldssyni og Eiði Smára Guðjohnsen.

Ísland átti ekki skot að marki í fyrri hálfleik en í þeim síðari færðist liðið framar á völlinn. Á 71. mínútu skoraði Gunnar Heiðar en hann kom inn sem varamaður. Eiður kom Íslandi tveimur mörkum yfir á 82. mínútu en heimamenn minnkuðu muninn fimm mínútum síðar.

Leikurinn var í beinni textalýsingu hér á Vísi og má sjá hana hér að neðan:

21:11 Leik lokið: Slóvakía 1-2 Ísland

21:11 Tryggvi Guðmundsson inn fyrir Emil þegar 92 mínútur eru á klukkunni.

21:10 Skrtel skallar yfir úr fínu færi í uppbótartíma. Þarna hefðu Slóvakar getað jafnað.

21:08 Veigar Páll Gunnarsson kemur inn fyrir Eið Smára á 90. mínútu. Veigar að spila sinn nítjánda landsleik.

21:05 MARK Slóvakía 1-2 Ísland Marek Mintal minnkar muninn með hörkuskoti við vítateigslínuna á 87. mínútu.

21:00 MARK Slóvakía 0-2 Ísland Eiður Smári kemur Íslandi í 2-0. Ekki hans flottasta mark. Ísland fékk hornspyrnu og eftir vandræðagang í vörn heimamanna datt boltinn fyrir Eið sem kom boltanum í netið.

20:56 Slóvakar hafa fengið nokkur góð færi til að jafna metin sem ekki hafa nýst. Rúmar tíu mínútur til leiksloka.

20:50 MARK Slóvakía 0-1 Ísland Varamaðurinn Gunnar Heiðar kemur Íslandi yfir. Bjarni Ólafur Eiríksson átti fyrirgjöf frá vinstri. Gunnar var í teignum og hamraði boltann glæsilega í netið, óverjandi fyrir markvörð Slóvaka

20:48 Heimamenn nálægt því að brjóta ísinn. Áttu gott skot sem Kjartan varði í horn. Eftir hornspyrnuna kom síðan skalli naumlega framhjá.

20:45 Skipting á 66. mínútu. Atli Sveinn Þórarinsson kemur inn fyrir Grétar Rafn. Ragnar færist þar með í hægri bakvörðinn en Atli fer í miðvörðinn.

„Seinni hálfleikurinn hefur verið mun betri hjá íslenska liðinu. Við sækjum meira, höldum boltanum betur og erum klókari," segir Bjarni Jóhannsson.

20:42 Fyrsta skipting íslenska liðsins á 64. mínútu. Theodór Elmar fer af velli en í stað hans kemur Gunnar Heiðar Þorvaldsson.

20:40 Slóvakar fengu mjög gott færi en Kjartan Sturluson varði virkilega vel í horn. Kjartan hefur nú haldið marki íslenska landsliðsins hreinu í 315 mínútur.

20:37 Ólafur Ingi fær fyrsta gula spjald leiksins fyrir harða tæklingu.

20:34 Fyrsta skot Íslands kemur á 55. mínútu. Brotið var á Eiði Smári, sem hefur varla verið sjáanlegur í leiknum, og dæmd aukaspyrna. Emil skaut úr spyrnunni en boltinn yfir markið og engin hætta.

20:31 Ísland fékk sína fyrstu hornspyrnu en markvörður heimamanna varði fyrirgjöfina auðveldlega.

20:27 Seinni hálfleikur er hafinn og íslenska liðið náði að bjarga á línu eftir aðeins þriggja mínútna leik. Það er ofankoma og kuldalegt í Slóvakíu. Engar breytingar voru gerðar á íslenska liðinu í hálfleiknum.

„Heilt yfir hefur Aron Einar verið okkar besti maður. Vonandi heldur hann áfram að þroskast og þróast í rétta átt. Maður sér það strax að þarna er leikmaður sem við getum byggt eitthvað kringum," segir Ólafur Þórðarson, gestur í myndveri Stöðvar 2 Sport.

20:12 Ísland átti ekki skot að marki í fyrri hálfleiknum en vonandi breytist það í seinni hálfleik. Leikur íslenska liðsins batnaði eftir því sem á hálfleikinn leið.

20:07 Hálfleikur - Staðan markalaus.

20:01 Slóvakar með skalla í stöng á 40. mínútu. Léleg dekkning hjá íslenska liðinu sem slapp þarna með skrekkinn.

19:51 Marek Sapara með fínt skot úr aukaspyrnu af talsverðu færi. Kjartan Sturluson tók enga áhættu og varði boltann vel í horn.

„Ég held að við getum verið mjög sáttir við spilamennskuna. Við fengum á okkur færi á fyrstu tíu mínútunum en síðan höfum við verið að spila þetta vel. Við eigum reyndar enn eftir að eiga almennilegt skot á markið en það kemur með þolinmæðinni," segir Bjarni Jóhannsson sem lýsir leiknum á Stöð 2 Sport.

19:42 Slóvakar hika ekki við að skjóta af löngum færum. Áttu skot rétt framhjá rétt áðan og svo skot rétt yfir.

19:37 Heimamenn verið mun líklegri fyrsta stundarfjórðunginn og nóg að gera hjá varnarmönnum íslenska liðsins.

19:32 Slóvakar hættulegir. Ragnar Sigurðsson gerði slæm mistök í vörninni og heimamenn skutu í slá. Kristján Örn skallaði boltann í horn. Eftir hornið náðu Slóvakar skoti á markið en það laust og beint á Kjartan Sturluson.

19:29 Fyrsta sókn Íslands. Theodór Elmar átti góða sendingu í teiginn á Emil Hallfreðsson sem nær þó ekki að taka á móti boltanum.

19:26 Slóvakar fengu fyrstu hornspyrnu leiksins eftir fimm mínútna leik en boltinn yfir alla í teignum. Emil Hallfreðsson varð fyrir samstuði og haltrar aðeins en við vonum að hann jafni sig á því.

19:20 Leikurinn er farinn af stað. Martin Skrtel, varnarmaður Liverpool, er fyrirliði Slóvaka.

19:16 Verið er að spila þjóðsöngvana. Kristján Örn Sigurðsson er fyrirliði íslenska landsliðsins í fyrsta sinn en hann er að leika sinn 28. landsleik.

„Ég vil fyrst og fremst sjá góðan varnarleik, ef við sjáum hann í dag þá vitum við að liðið er á réttri leið," segir Magnús Gylfason fyrir leikinn á Stöð 2 Sport.

19:08 Nú eru aðeins nokkrar mínútur í þennan leik en hann er sýndur í beinni útsendingu á Stöð 2 Sport.

Lið Íslands (4-5-1): Kjartan Sturluson (m); Grétar Rafn Steinsson, Ragnar Sigurðsson, Kristján Örn Sigurðsson (f), Bjarni Ólafur Eiríksson; Aron Einar Gunnarsson, Stefán Gíslason, Ólafur Ingi Skúlason, Theodór Elmar Bjarnason, Emil Hallfreðsson; Eiður Smári Guðjohnsen.