Chicago - Denver í beinni á Sýn í nótt

Leikur Chicago Bulls og Denver Nuggets í NBA deildinni verður sýndur beint á Sýn í nótt klukkan eitt eftir miðnætti Hér er á ferðinni viðureign tveggja liða sem eru í harðri baráttu um sæti í úrslitakeppninni.

Denver liðið hangir sem stendur naumlega inni í áttunda og síðasta sætinu inn í úrslitakeppnina í Vesturdeildinni með 33 sigra og 20 töp, en Chicago er tveimur leikjum frá áttunda sætinu í Austurdeildinni - en er aðeins með 21 sigur og 32 töp.

Það eru þeir Allen Iverson og Carmelo Anthony sem fara fyrir stjörnuliði Denver að vanda en þeir eru tveir af stigahæstu leikmönnum NBA deildarinnar.

Chicago liðið stóð í strórræðum á leikmannamarkaðnum í gærkvöldi þegar það sendi frá sér þá Ben Wallace og Joe Smith til Cleveland í skiptum fyrir Larry Hughes og Drew Gooden. Óvíst er hvort nýju leikmennirnir verði með Chicago liðinu í kvöld, en ljóst er að forráðamenn Chicago eiga mikið og erfitt verkefni fyrir höndum með að koma liðinu á réttan kjöl eftir gríðarleg vonbrigði í vetur.