Öruggur sigur KR á Haukum

Þrír leikir fóru fram í Iceland Express deild kvenna í dag. KR vann öruggan sigur á Haukum, 89-75.

Jafnræði var með liðunum í fyrri hálfleik en KR hafði fjögurra stiga foyrstu í leikhléi, 44-40. KR tók hins vegar öll völd í þriðja leikhluta og var staðan 68-52 þegar síðasti leikhlutinn hófst.

Monique Martin skoraði 45 stig fyrir KR í leiknum, meira en helming stiga liðsins í leiknum, og tók þar að auki þrettán fráköst.

Sigrún Ámundadóttir skoraði þrettán stig fyrir KR og Guðrún Ósk Ámundadóttir tíu.

Hjá Haukum var Kristrún Sigurjónsdóttir stigahæst með nítján stig og Unnur Tara Jónsdóttir var með átján.

Topplið Keflavíkur vann tíu stiga sigur á botnliði Fjölnis, 69-59, og Grindavík vann nauman sigur á Hamar, 72-69.

Keflavík er á toppnum með 30 stig en KR og Grindavík eru með 28 stig. Haukar eru með 22 stig.