Stjarnan enn í góðum séns

Stjörnunni tókst í dag að minnka forskot Selfyssinga sem er í öðru sæti 1. deildar karla niður í tvö stig þegar þrjár umferðir eru eftir í deildinni.

Stjarnan vann 3-0 sigur á Fjarðabyggð í dag og komu öll þrjú mörk leiksins í síðari hálfleik. Þorvaldur Árnason skoraði fyrstu tvö mörkin og svo Zoran Stojanovic.

Selfoss tapaði í gær á útivelli fyrir Víkingi, Ólafsvík, 4-3. Selfoss er því enn með 40 stig í öðru sæti deildairnnar en Stjarnan er nú komið með 38 stig í því þriðja.

ÍBV er nánast öruggt með sæti í Landsbankadeildinni að ári en liðið er í efsta sæti með 46 stig og dugir einn sigur til viðbótar til að gulltryggja endurkomu sína í keppni þeirra bestu hér á landi.

Þar sem Fjarðabyggð tapaði í dag er liðið ekki endanlega sloppið við falldrauginn þó það standi ágætlega að vígi. Liðið er með 20 stig í níunda sæti deildairnnar, sex stigum á undan Njarðvík sem er í ellefta sæti og á leik til góða.

Það er mikill fallslagur framundan í 1. deildinni í dag en núna klukkan 14.00 mætast botnliðin tvö, Njarðvík og KS/Leiftur. Síðarnefnda liðið er í neðsta sæti deildairnnar með ellefu stig, þremur stigum á eftir Njarðvík.

Leiknir er svo í tíunda sæti með sautján stig. Liðið mætir KA á heimvelli klukkan 16.00 í dag. Norðanmenn sigla lygnan sjó um miðja deild og eiga hvorki möguleika að komast upp né að falla.

Úrslit:

Stjarnan - Fjarðabyggð 3-0

1-0 Þorvaldur Árnason (54.)

2-0 Þorvaldur Árnason (67.)

3-0 Zoran Stojanovic (90.)

Víkingur, Ó. - Selfoss 4-3

0-1 Viðar Örn Kjartansson (2.)

1-1 Josip Marosevic (14.)

2-1 Josip Marosevic (16.)

2-2 Henning Eyþór Jónasson (38.)

2-3 Sævar Þór Gíslason (41.)

3-3 Sjálfsmark (73.)

4-3 Brynjar Víðisson (86.)