Árni Gautur: Skoða öll tilboð með opnum huga

Landsliðsmarkvörðurinn Árni Gautur Arason hefur ákveðið að hætta hjá norska liðinu Valerenga. Hann segir hafa verið kominn tíma til að breyta til eftir þrjú og hálft ár í herbúðum liðsins.

Árni var með lausa samninga hjá norska liðinu, en segir það hafa boðið honum samning fyrir nokkru síðan. "Ég var bara óákveðinn á þeim tíma og var ekki tilbúinn til að semja áfram, enda hefur blundað í mér að breyta til. Ég fundaði svo með þeim í gær og þar ákváðum við að þetta væri orðið ágætt í bili og þeir ætla að finna sér annan markvörð til framtíðarinnar," sagði Árni í samtali við Vísi í kvöld.

Hann segir framtíð sína algjörlega óráðna og ætlar að setjast niður og skoða hvaða möguleikar eru í boði. "Ég hef fengið nokkrar fyrirspurnir frá liðum héðan og þaðan frá Evrópu, bæði í Noregi og annarsstaðar, en það er allt á grunnstigi ennþá og því er ekkert hægt að segja um það," sagði Árni.

Hann útilokar ekkert í framtíðinni, en þykir ólíklegt að til greina komi að koma heim til Íslands að spila. "Ég á ekki von á því að koma heima að spila en ég mun skoða allt með opnum huga - hvort sem það verður hér í Noregi eða hvað það verður," sagði Árni.

Árni hefur verið hjá Valerenga síðan árið 2004 og var lykilmaður í liðinu sem vann meistaratitilinn árið 2005 eftir langa bið. Þar áður var hann margfaldur meistari með liði Rosenborg.