Mamma Madeleine ekki nógu móðurleg

Kate McCann telur að hún sé áreitt af fólki sem telji hana flækta í hvarf Madeleine af því að útlit hennar sé ekki nógu móðurlegt.

Susan Healy, móðuramma Madeleine viðurkennir að hjónin hafi gert hræðileg mistök þegar þau skildu börnin þeirra þrjú eftir ein í íbúðinni í Praia da Luz. Hún varði sakleysi dóttur sinnar sem hefur réttarstöðu grunaðrar í Portúgal vegna hvarfsins.

Í viðtali við the Liverpool Echo sagði Susan að Kate teldi að ef hún væri 15 kílóum þyngri, hefði bústnari barm og væri móðurlegri í útliti, myndi fólk hafa meiri samúð með henni.

Hún sagði að Kate fyndist hún vera lögð í einelti af sumum fjölmiðlum, almenningur hefði þó sýnt henni einstaklega mikinn stuðning.

"Kate er ekki alltaf með stjórn og það er mikilvægt að fólk viti það," sagði Susan. Hún bætti við að dóttir hennar væri ein móðurlegasta kona sem hún þekkti og að líf hennar snerist í kringum börnin.

Susan og maður hennar Brian sögðust halda í vonina um að barnabarn þeirra fyndist á lífi. Þau viðurkenndu að fréttir af því að portúgalska lögreglan ætlaði að leita í stöðuvatni um 20 kílómetra frá Praia da Luz væru ógnvekjandi.