Smyglskútan flutt til Reykjavíkur

Smyglskútan á Fáskrúðsfirði verður flutt til Reykjavíkur á morgun. Þeir sem handteknir voru í aðgerðum lögreglunnar í Reykjavík eru komnir til Reykjavíkur. Gera má ráð fyrir að þeir verði úrskurðaðir í gæsluvarðhald í dag.

Heimildir Vísis herma að skútan verði fluttur landleiðina á flutningabíl. Skútur af þessari stærð eru með þónokkuð burðarþol og ætti að vera hægðarleikur að smygla nokkur hundruð kílóum til landsins í einni ferð, miðað við að tveir séu í áhöfn.

Enn sem komið er greinir menn nokkuð á um hverrar tegundar skútan sem um ræðir er. Líklegast er talið að um sé að ræða Bavaria 30. Skútan er um það bil 30 fet og um þrír og hálfur metri á breidd.

Samkvæmt heimildum Vísis koma á annan tug erlendra skúta til landsins á hverju sumri. Haraldur Johannesen ríkislögreglustjóri sagði á blaðamannafundi í morgun að í raun væri siglingaleiðin til Íslands frá Evrópu opin og því þyrfti að tryggja hafnir landsins betur en nú er.

Undir þetta tekur heimildamaður Vísis sem er vel að sér í skútusiglingum. Hann segir tolleftirliti áfátt, sérstaklega í smærri höfnum landsins og því væri um að ræða þægilega leið fyrir smyglara. Í dag eru að minnsta kosti þrjár eða fjórar erlendar skútur í höfnum landsins.

Hér fyrir neðan er myndaalbúm sem sýnir innviði Bavaria 30 skútu. Á myndunum má sjá að það hefur greinilega ekki væst um smyglarana á leiðinni yfir Atlantshafið.