Anna Jódís og Valdís efstar í kvennaflokki

Anna Jódís Sigurbergsdóttir úr GK og Valdís Þóra Jónsdóttir úr GL deila efsta sæti eftir fyrsta hring í kvennaflokki á Íslandsmótinu á Hvaleyrinni. Þær léku báðar hringinn í dag á 75 höggum, eða 4 höggum yfir pari.

Fjórar koma síðan fast á eftir á 76 höggum, en það eru þær Ragnhildur Sigurðardóttir úr GR, Nína Björk Geirsdóttir úr GKj, Heiða Guðnadóttir úr GS og Íslandsmeistarinn frá í fyrra, Helena Árnadóttir úr GR.

Tinna Jóhannsdóttir úr GK lék á 77 höggum og Ragna Björk Ólafsdóttir á 78 höggum eins og Þórdís Geirsdóttir, sem var lengi vel í toppbaráttunni, en hún tapaði 5 höggum á síðustu þremur holunum. Hanna Lilja Sigurðardóttir úr GR er í 10. sæti ásamt Signý Arnórsdóttur, en þær léku á 79 höggum.

Það er mikil spenna í kvennaflokki, eins og reyndar í karlaflokki líka og verður forvitnilegt að sjá hvernig mál þróast á morgun.

Kylfingur.is