Ísland með Svíum, Frökkum og Slóvökum á EM-2008

Búið er að draga í riðla fyrir Evrópukeppnina í handknattleik sem fram fer í Noregi í janúar og febrúar á næsta ári. Ísland leikur í D-riðli með Svíum, Frökkum og Slóvökum. Einar Þorvarðarson, framkvæmdarstjóri HSÍ, segir riðilinn mjög erfiðan en það sé allt hægt og bendir á að Ísland hefur bæði unnið Frakka og Svía nýlega.

„Þetta er mjög erfiður riðill eins og við var að búast í þessu móti, við vitum allt um styrk Frakka og Svía. Slóvakar eru hinsvegar óskrifað blað. Við höfum unnuð bæði Frakka og Svía nýlega þannig að það er allt hægt. Ég tel möguleika okkar á því að komast í milliriðil góða, það er að segja að lenda í fyrstu þremur sætum riðilsins," sagði Einar Þorvarðarson, framkvæmdarstjóri HSÍ, í samtalið við Vísi.is.

Um val Norðmanna á riðli sagði Einar „Það kom ekkert á óvart, þeir forðast Svíana en sjá möguleika á móti Rússum og Svartfellingum."

D-riðill sem Ísland leikur í fer fram í Þrándheimi og verður fyrsti leikurinn gegn Svíum þann 17. janúar, því næst er leikið við Slóvaka 18. eða 19. janúar og svo þann 20. við Frakka. Þrjú efstu liðin komast áfram í milliriðla keppninnar.

Í A-riðli Leika Króatar, Slóvenar, Pólverjar og Tékkar.

Í B-riðli leika Danir, Rússar, Norðmenn og Svartfellingar.

Í C-riðli leika Spánverjar, Þjóðverjar, Ungverjar og Hvít-Rússar.

Styrkleikaflokkar og útdrátturinn



1. Styrkleikaflokkur: Frakkland, Spánn, Danmörk og Króatía

2. Styrkleikaflokkur: Þýskaland, Rússland, Ísland og Slóvenía

3. Styrkleikaflokkur: Pólland, Noregur, Slóvakía og Ungverjaland

4. Styrkleikaflokkur: Hvíta-Rússland, Svartfjallaland, Svíþjóð og Tékkland

Ekkert lið gat mætt liði úr sama styrkleikaflokki í riðlakeppninni. Fyrst var dregið í alla riðla úr 1,2 og 4 styrkleikaflokk, en þá máttu gestgjafarnir Norðmenn velja sér riðil áður en 3. styrkleikaflokkur var kláraður.

Punktar

• Svartfjallaland tekur þátt í fyrsta sinn í sögu keppninnar
• Svíþjóð er aftur með eftir að hafa mistekist að komast í keppnina fyrir tveimur árum
• Riðlarnir verða spilaðir í Bergen, Drammen, Stavangri og Þránheimi
• Milliriðlar verða spilaðir í Stavangri og Þrándheimi
• Úrslitaleikirnir verða spilaðir í Lilleheimer

Heimasíða keppninnar.