Laporta: Rijkaard verður áfram

Joan Laporta, forseti Barcelona, segir að þjálfarinn Frank Rijkaard verði áfram í starfi út næstu leiktíð. Þessa yfirlýsingu gaf hann út í dag í kjölfar sögusagna sem fóru á kreik í gær um að félagið ætlaði að reyna að fá til sín Arsene Wenger frá Arsenal.

"Rijkaard verður áfram þjálfari Barcelona á næstu leiktíð. Við vitum allir að við eigum hver og einn þátt í því sem miður fór á leiktíðinni í ár þar sem við misstum af titlum á síðustu stundu. Rijkaard veit hvað við ætlum okkur á næstu leiktíð og veit hvað þarf að laga," sagði Laporta. Hann bætti því við að þeir Ronaldinho og Samuel Eto´o yrðu ekki seldir frá félaginu.