Biðin eftir Simpsons styttist

Biðin eftir komu vinsælustu fjölskyldu heims á hvíta tjaldið styttist óðum, en myndin um Simpson fjölskylduna verður frumsýnd um allan heim þann 27. júlí næstkomandi.

Til að auðvelda biðina, hefur verið gefið út kort af bænum og íbúum hans sem má sjá hér að neðan.

Mikil leynd ríkir yfir söguþræði myndarinnar. James L. Brooks, framleiðandi þáttanna hefur látið hafa það eftir sér að þeir muni leka nokkrum mismunandi útgáfum af söguþræðinum, ,,bara til að gera þetta áhugavert". Kvikmyndasíðan IMDB segir söguna vera um að Hómer þurfi að bjarga heiminum frá vandræðum sem hann átti sjálfur þátt í að skapa.

Þættirnir um Simpson-fjölskylduna hafa notið gríðarlegra vinsælda þau átján ár sem þeir hafa verið sýndir í sjónvarpi. Fjölskyldan er sköpunarverk Matt Groening, en hún birtist fyrst sem sketsar í ,,The Tracey Ullman Show" þann 19. apríl árið 1987. Rúmum tveimur árum síðar, í desember 1989 var fyrsti sjálfstæði þátturinn sýndur og síðan þá hafa þeir keyrt óslitið og unnið til fjölda verðlauna.