Hundruð milljóna svik á ári hverju

Hundruð milljóna króna eru svikin út úr Tryggingastofnun á ári hverju ef umfang tryggingasvika hér er sambærilegt við Svíþjóð. Tryggingastofnun hefur fengið um 130 ábendingar frá almenningi síðan eftirlit var tekið upp hjá stofnuninni. Um helmingur þeirra hefur reynst á rökum reistur.

Starfsemi eftirlitsins hjá Tryggingastofnun hefur ekki farið hátt en því var komið á laggirnar árið 2005. Síðan þá hafa 200 tryggingasvikamál verið upplýst. Svikin eru einkum þrenns konar.

Í fyrsta lagi þegar fólk skráir sig sem einstætt foreldri en er það ekki. Af 200 málum sem Tryggingastofnun hefur rannsakað og upplýst eru 117 vegna fólks sem svíkur bætur út úr kerfinu með því að skrá sig einstætt foreldri en er í raun í sambúð og makinn hefur þá skráð lögheimili annars staðar.

Í öðru lagi þegar fólk svíkur út atvinnuleysisbætur en stundar svarta vinnu. 69 slík mál hafa verið upplýst frá 2005.

Og í þriðja lagi eru sérfræðingar í heilbrigðisþjónustu sem senda frá sér tilhæfulausa reikninga eða rukka fyrir þjónustu sem er ekki að fullu veitt. Tíu slík mál hafa verið upplýst.

Um 130 ábendingar komið frá almenningi. Eftirlitið hefur rannsakað stóran hluta þeirra og upp undir helmingur ábendinganna hefur reynst á rökum reist.

Gunnar segir rannsókn yrði mun auðveldari ef heimildir væru rýmri til að afla upplýsinga. Verið er að taka þessi mál út fyrir Tryggingastofnun og skoða hvaða heimildir myndu gagnast best, einnig hvort rétt sé að herða viðurlög.

Í Svíþjóð er áætlað að um eitt prósent í almannatryggingunum séu svik. Hér fara um 75 milljarðar á ári gegnum Tryggingastofnun, eitt prósent af því væri 750 milljónir.