Lyfjaþjófur tók of stóran skammt

Brotist var inn í lyfjaverslun í austurborginni á fjórða tímanum í nótt og nokkuð magn af lyfjum tekið. Þegar lögreglan kom á staðinn var þjófurinn á bak og burt. Skömmu seinna barst tilkynning um að karlmaður um tvítugt hefði tekið of stóran skammt af lyfjum. Það reyndist vera innbrotsþjófurinn sem var líklega að innbyrða sönnunargögnin.

Maðurinn var færður á slysadeild þar sem dælt var upp úr honum. Hann viðurkenndi brotið og verður yfirheyrður þegar hann er úrskrifaður af sjúkrahúsinu seinna í dag.