Tiger langt frá sínu besta á Players

Besti kylfingur heims, Tiger Woods, var langt frá sínu besta á fyrsta hringnum á Players-meistaramótinu í golfi. Woods lék á 3 höggum yfir pari og er í 58.-74. sæti. Bein útsending verður á Sýn annað kvöld og á sunnudagskvöld.

Tiger Woods paraði 15 holur og fékk 3 skolla. Þetta er í fyrsta sinn í fjögur ár sem hann fær ekki fugl á hringnum, síðast gerðist það á fyrsta degi á Masters 2003. Woods er á þremur höggum yfir pari og því átta höggum á eftir Phil Mickelson og Rory Sabatini. Mickelson fékk 6 fugla í gær og einn skolla. Hann lék vel við erfiðar aðstæður.

Suður-Afríkumaðurinn Rory Sabatini hefur þrisvar hrósað sigri í PGA-mótaröðinni. Hann var um tíma á 6 undir pari.

Chris Di Marco er einn í þriðja sæti á 4 undir pari og Peter Lonard er í fjórða sæti á 3 undir pari.

Spánverjinn Sergio Garcia er á einu höggi yfir pari en teighögg hans á sautjándu braut fór í vatnið. Garcia var nærri búinn að bjarga parinu.