Skilorðsbundið fangelsi fyrir vörslu amfetamíns

Karlmaður var í Héraðsdómi Reykjaness í dag dæmdur í níu mánaða skilorðsbundið fangelsi fyrir vörslu rúmlega 40 gramma af amfetamíni, en efnið fannst í bíl hans við leit lögreglu í september í fyrra.

Maðurinn játaði brotið en með því rauf hann skilorð dóms sem hann fékk í desember árið 2004 fyrir þjófnað og tilraun til þjófnaðar. Hins vegar var tekið tillit til þess að maðurinn hafði leitað sér aðstoðar vegna fíkniefnavanda og var því ákveðið að refsing hans yrði skilorðsbundin til þriggja ára. Auk refsingarinnar sætti maðurinn upptöku á fíkniefnunum með dóminum.