Sex efstir og jafnir á Shell mótinu

Sex kylfingar deila efsta sætinu að loknum tveimur hringjum á Opna Shell Houston mótinu í golfi sem er liður í PGA mótaröðinni. Sýn verður með beina útsendingu frá mótinu annað kvöld.

Ástralinn Stuart Appleby sem hefur titil að verja á mótinu lék á pari í gærkvöldi og deilir efsta sætinu með fimm Bandaríkjamönnum. Appleby lék fyrsta hringinn á 6 höggum undir pari og sá árangur heldur honum í toppbaráttunni nú þegar mótið er hálfnað.

Þeir Bandaríkjamenn sem deila efsta sætinu með Ástralanum á 6 höggum undir pari eru Jason Gore, Bubba Watson, D.J. Brigman, Bob Estes og Jeff Maggert. Meðal heimsþekktra kylfinga sem ekki eru meðal efstu manna má nefna Írann Padraig Harrington og Englendinginn Lee Westwood sem rétt komust í gegnum niðurskurðinn og eru á einu höggi undir pari.

Leikið er í Houston í Texas en mjög vindasamt var á Redstone golfvellinum og gerði kylfingum mjög erfitt fyrir. Hér sjáum við flott tilþrif hjá Bandaríkjamanninum Brian Gay sem náði erni með þessu höggi og komst þannig í gegnum niðurskurðinn sem miðast við eitt högg yfir parið. Bein útsending verður á Sýn annað kvöld frá lokahringnum.