Staðfestir gæsluvarðhald yfir meintum nauðgara

Hæstiréttur staðfesti í dag gæsluvarðhaldsúrskurð yfir ungum manni sem grunaður er um að hafa nauðgað konu á salerni í kjallara Hótels Sögu aðfaranótt laugardagsins síðasta. Maðurinn var handtekinn á sunnudaginn og úrskurðaður í gæsluvarðhald til 28. mars í Héraðsdómi Reykjavíkur á mánudaginn en maðurinn kærði þann úrskurð.

Hann neitar sök og segist hafa haft samræði við stúlkuna með hennar vilja. Hæstiréttur staðfesti hins vegar úrskurð héraðsdóms með því að vísa eins og héraðsdómur til þess að rannsóknarhagsmunir krefjist þess, en lögregla rannsakar enn málið.