Geir boðar breytingar hjá KSÍ

Geir Þorsteinsson, nýkjörinn formaður KSÍ, boðar breytingar hjá knattspyrnusambandinu nú þegar hann tekur við starfi Eggerts Magnússonar. “Vitanlega munum við sjá breytingar á komandi tímum. Ég er allt annar maður en Eggert Magnússon,” sagði Geir eftir að úrslitin lágu ljós fyrir. Ítarlegt viðtal við Geir, sem og aðra frambjóðendur, verður sýnt í kvöldfréttum stöðvar 2 kl. 18:50.

Geir hlaut 86 atkvæði í fyrsta sæti en Jafet Ólafsson, sem lenti í öðru sæti í kjörinu með 29 atkvæði, gagnrýndi nokkur knattspyrnufélög í landinu fyrir að lýsa opinberlega yfir stuðningi við frambjóðanda sex vikum áður en framboðsfrestur rann út, en sú var raunin með Geir Þorsteinsson. “En ég fer í alla kappleiki til að vinna og ég tapaði í þetta skiptið. Ég óska Geir til hamingju,” sagði Jafet.

Halla Gunnarsdóttir viðurkenndi að hafa átt von á meiri stuðningi, en hún hlaut ekki nema 3 atkvæði. “En ég hef svo sem áður tapað fyrir KR á útivelli,” sagði Halla og átti þar við KR-inginn Geir Þorsteinsson.