Dell snýr aftur til Dell

Gengi hlutabréfa í bandaríska tölvurisanum Dell hefur hækkað um 5 prósent á hlutabréfamörkuðum vestanhafs í kjölfar frétta þess efnis að Michael Dell, stofnandi fyrirtækisins, hygðist setjast í forstjórastólinn á nýjan leik. Dell stofnaði fyrirtækið á háskólaárum sínum árið 1984 og var forstjóri fyrirtækisins til 2004 þegar hann gerðist stjórnarformaður.

Ástæðan fyrir því að Dell tekur við forstjórastólinum á nýjan leik er sú að fyrirtækið hefur sent frá sér neikvæða afkomuviðvörun vegna slælegrar afkomu fyrirtækisins á fjórða ársfjórðungi 2006. Gert er ráð fyrir að afkoma fyrirtækisins verði nokkuð undir væntingum markaðsaðila. Þá hafa fjármálayfirvöld skoðað í bækur Dell en grunur leikur á að skekkja sé í bókhaldi Dell. Vegna þessa hefur Kevin Rollins, forstjóri Dell, sagt upp störfum.

Michael Dell mun eftir sem áður starfa sem stjórnarformaður þótt hann gegni forstjórastöðu fyrirtæksins. Greinendur segja stöðuna slæma og benda á að Dell verði að spýta í lófana eigi honum að takast að laga til í rekstrinum og hindra að Hewlett-Packard, helsti keppinautur fyrirtækisins, geti nýtt sér tækifærið og saxað á markaðshlutdeildina.