Sleppti írökskum föngum og skaut þá síðan

Bandarískur hermaður hefur verið dæmdur í 18 ára fangelsi fyrir að hafa myrt þrjá Íraka nærri Tíkrít í maí í fyrra. Maðurinn viðurkenndi fyrir herdómstóli að hafa sleppt Írökunum þremur úr haldi og skotið þá þegar þeir hlupu í burtu. Segist hann hafa verið að hlýða skipunum yfirmanns síns í hernum en hann er einnig ákærður vegna málsins ásamt tveimur öðrum.

Þetta er ekki eina málið þar sem bandarískir hermenn eru sakaðir um glæpi gegn heimamönnum í Írak því Bandaríkjaher rannsakar nú mál fjögurra annarra úr sömu herdeild sem sakaðir eru um að hafa nauðgað ungri stúlku og myrt hana og fjölskyldu hennar í bænum Mahmudiya.