Útrás í anda stjórnarsáttmála

Útrás Landsvirkjunar og Landsbankans í gegnum HydroKraft Invest er í samræmi við stefnuyfirlýsingu ríkisstjórnarinnar frá því í maí, að sögn Friðriks Sophussonar, forstjóra Landsvirkjunar. Þar er talað um að tímabært sé „að leysa úr læðingi krafta einkaframtaksins svo að íslensk sérþekking og hugvit fái notið sín til fulls í útrás orkufyrirtækja“.

Aukinheldur telur Friðrik umræðu sem í gangi er um útrás Orkuveitunnar með REI ekki eiga við um HydroKraft, sem sé að helmingi í eigu dótturfélags Landsvirkjunar og hafi fyrst og fremst leitað vatnsaflsverkefna í suðausturhluta Evrópu. Hann bendir á að Landsvirkjun sé eingöngu í samkeppnis- en ekki einkaleyfisbundinni starfsemi.

Þá hafi ekki enn verið ráðnir starfsmenn til HydroKraft, heldur vinni starfsfólk Landsbankans og Landsvirkjunar með stjórnarmönnum. „Og því ekki um kauprétt eða valréttar­samninga að ræða.“