Séní af ísfirskum ættum

Sellóleikarinn Erling Blöndal Bengtsson lýkur afmælisferð sinni um Ísland með tónleikum hjá Kammermúsíkklúbbn-um í kvöld. Erling fagnaði 75 ára afmæli sínu síðastliðinn fimmtudag og hélt þá tónleika á Ísafirði en í vikunni lék hann einnig fyrir Norðlendinga ásamt píanóleikaranum Ninu Kavtaradze og Einari Jóhannessyni klarinettuleikara.

Erling er Ísfirðingur í móðurætt en fæddur í Kaupmannahöfn. Hann var aðeins fjögurra ára gamall þegar hann kom fyrst fram á tónleikum en frægðarsól hans hefur skinið skært æ síðan. Hann hefur leikið með stærstu hljómsveitum heims, gefið út meira en sextíu hljómplötur og mörg þekktari samtímatónskáld hafa samið fyrir hann einleiksverk og konserta.

Erling hefur ávallt haldið góðu sambandi við Ísland og haldið hér fjölda tónleika. Hann lék fyrst í Gamla bíói vorið 1946 en hann leikur nú fyrir félaga Kammermúsíkklúbbsins í fimmtánda sinn en tónleikarnir eru jafnframt lokahnykkur afmælisdagskrár klúbbsins sem nú hefur starfað í 50 ár.

Erling Blöndal Bengtsson og Nina Kavtaradze, tengdadóttir hans, hafa leikið saman sem „dúó“ síðan 1986 en þetta er í fyrsta sinn sem Einar leikur með þessum dáða snillingi. „Þetta er aldeildis hátíð í mínu lífi að fá loksins að spila með þessum ótrúlega tónlistarmanni,“ segir Einar en þeir hafa þó unnið saman á tónlistarvettvanginum því Einar stjórnaði á sínum tíma upptökum á sellókonsert Jóns Nordal. „Erling er einn af þessum toppum í klassíska heiminum og ómetanlegt fyrir okkur að eiga svona mikið í þessum manni,“ segir Einar um áhrif Erlings á íslenskt tónlistarlíf.

Á efnisskrá kvöldsins er glæsileg sellósónata eftir Beethoven, klarinettutríó eftir Johannes Brahms og sellósónata eftir Sjostakovítsj sem af mörgum er álitið eitt magnaðasta sellóverk tónbókmenntanna. Tónleikarnir fara fram í Bústaðakirkju og hefjast kl. 20.