Fékk stjörnuglampa í augun

Jörundur Ragnarsson hefur verið ráðinn í stórt hlutverk í sjónvarpsþáttunum Næturvaktin við hlið Jóns Gnarr og Pétur Jóhans Sigfússonar en þættirnir gerast á bensínstöð í Reykjavík þar sem Jón og Pétur ráða ríkjum.

Rágert að upptökur hefjist í lok næstu viku og er ráðgert að hefja sýningar á þeim á Stöð 2 um páskanna. „Ég leik ungan strák sem kemur til starfa þarna og kynnist stórskrýtinni veröld þessar furðufugla," segir Jörundur sem vildi lítið tjá sig um sína persónu og telur að hún eigi eftir að koma á óvart.

„Þættirnir eru í raun þrosksasaga þessa unga manns og ég á að vera „normið" innan um þessa geðsjúklinga en það flettist hægt og bítandi ofan af honum," útskýrir hann og hlær en Jörundur segist hafa fengið stjörnuglampa í augun þegar hann hitti mótleikara sína tvo í fyrsta sinn. „Ég hafði fylgst vel með þeim í gegnum árin og horft upp til þeirra," segir leikarinn ungi.

Jörundur útskrifaðist úr leiklistarskólanum í haust og hefur verið á fullu síðan. Hann vakti mikla athygli fyrir frammistöðu sína í söngleiknum Footloose og er í stórum hlutverkum í tveimur íslenskum kvikmyndum sem frumsýndar verða í ár, Astrópíu eftir Gunnar Björn Guðmundsson og Veðrmót Guðnýjar Halldórsdóttir. „Þetta hefur gengið mjög vel og enginn skortur verið á verkefnum," segir Jörundur sem fær lítið frí þegar tökum á Næturvaktinni lýkur í lok febrúar en þá stígur hann á svið í Þjóðleikhúsinu í leikritinu Amma djöfull.