Woosnam íhugaði að segja af sér

Ian Woosnam, fyrirliði Evrópuliðsins í Ryder-keppninni fyrr á þessu ári, segist hafa íhugað að segja af sér eftir að danski kylfingurinn Thomas Bjorn gagnrýndi hann harðlega fyrir að velja sig ekki í lið Evrópu.

Það kom mörgum á óvart að Woosnam skyldi taka Lee Westwood frá Englandi fram yfir Björn, en sá danski hafði náð mun betri árangri í mótum ársins. Woosnam fór hins vegar eftir eigin sannfæringu og stýrði evrópska liðinu til frækins sigur, eins og eflaust flestir muna.

“Þetta var einn erfiðasti tími sem ég hef upplifað á mínum ferli. Ég var tilbúinn að segja starfi mínu lausu,” sagði Woosnam í samtali við Independent.

“Gagnrýnin sem ég fékk frá Björn var mjög óvæginn og hún særði mig mikið. En ummæli hans um að ég nyti ekki traust sumra þeirra kylfinga sem væru í liðinu fengu mest á mig. En þau áttu ekki við rök að styðjast,” sagði Woosnam.

Björn var sár og bitur fyrir því að vera ekki valinn og kallaði hann Woosnam hræsnara og svikara. Hann baðst síðar afsökunar á ummælum sínum og fékk háa sekt.