Gerrard er óðum að ná sér á strik

Rafa Benitez hefur látið í veðri vaka að leikurinn gegn Manchester United á Old Trafford á sunnudaginn muni marka nýtt upphaf fyrir Steven Gerrard, sem ekki hefur náð sér alveg á strik á leiktíðinni og hefur til að mynda enn ekki skorað mark í úrvalsdeildinni.

"Stevie veit að hann er lykilmaður fyrir okkur og ég sé hann verða betri og betri með hverri æfingunni. Hann er í góðu stuði þessa dagana og ég er ekki frá því að nú sé hans tími kominn. Við munum sjá það allra besta frá honum fljótlega og ég held að hann fari nú að skora mörk fyrir okkur aftur, því við þurfum sannarlega á því að halda," sagði Benitez, en Gerrard skoraði hvorki meira né minna en 23 mörk fyrir liðið á síðustu leiktíð sem er ekkert slor fyrir miðjumann.