Ferguson og Jewell hrósa Rooney

Sir Alex Ferguson, stjóri Manchester United og Paul Jewell, stjóri Wigan, skiptust á að hrósa Wayne Rooney fyrir frammistöðu hans í sigri United í dag. Rooney náði ekki að skora mark, en leikur hans þótti bera vitni um að hann væri að finna sitt fyrra form.

"Við vissum að það yrði erfitt að koma til baka eftir að hafa lent undir, en strákarnir voru frábærir í síðari hálfleiknum. Rooney sýndi að hann er búinn að finna fjölina sína á ný og hann og Saha voru handfylli fyrir varnarmenn Wigan í dag," sagði Ferguson ánægður.

Paul Jewell viðurkenndi að sínir menn hefðu verið yfirspilaðir í síðari hálfleiknum. "Við bökkuðum of mikið eftir að við skoruðum markið, en ég verð að viðurkenna að þeir yfirspiluðu okkur eftir hlé, þó ég hafi ekki verið sáttur við það hvað við gáfumst of auðveldlega upp. Hvað Rooney varðar, held ég að hver sá sem hefur verið að rakka hann niður undanfarið viti ekkert um knattspyrnu. Rooney er heimsklassa leikmaður, en hefur þurft að hlusta á mikið af bulli í fjölmiðlum undanfarið," sagði Jewell.