Kerkorian hættur við kaup í GM

Bandaríski auðkýfingurinn Kirk Kerkorian, sem er einn stærsti hluthafinn í bandaríska bílaframleiðandanum General Motors (GM), er hættur við að auka við hlut sinn í fyrirtækinu eins og til stóð. Ástæðan er sögð óánægja hans með að samstarfsviðræðum GM við Nissan og Renault var slitið fyrr í vikunni.

Kerkorian á 9,9 prósenta hlut eða 56 milljón bréf í GM í gegnum fjárfestingarfyrirtæki sitt Tracinda Corp. Félagið hafði í hyggju að kaupa allt að 12 milljón hluti í GM til viðbótar og fara yfir 10 prósenta markið.

Kerkorian átti stóran þátt í að stuðla að samstarfsviðræðum GM við Nissan og Renault en hann sendi Rick Wagoner, forstjóra GM, bréf þess efnis fyrr í sumar. Viðræðum var hins vegar slitið fyrr í vikunni þar sem GM taldi sig bera minni hlut úr býtum. Jerry York, sem sat í stjórn GM fyrir hönd Tracinda og Kerkorian. Hann sagði sig úr stjórn bandaríska bílaframleiða í dag.

Gengi hlutabréfa í GM lækkaði um 7 prósent í kauphöllinni í New York í Bandaríkjunum í dag í kjölfar þess að greint var frá því að York hefði sagt sig úr stjórn GM.

Greiningaaraðilar eru nú sagðir velta vöngum yfir því hvort Kerkorian íhugi að losa sig við hluta bréfa sinna í GM eða selji þau öll.