Zlatan verður ekki með Svíum gegn Íslendingum

Framherjinn Zlatan Ibrahimovic verður ekki með landsliði Svía þegar það sækir okkur Íslendinga heim í undankeppni EM í byrjun næsta mánaðar. Zlatan átti fund með Lars Lagerback í gær og þar var ákveðið að hann yrði ekki með landsliðinu í október þegar það mætir Íslendingum og Spánverjum í riðlakeppninni.

Ibrahimovic var einn þriggja leikmanna sem settir voru út í kuldann af landsliðsþjálfaranum fyrir leikinn gegn Liechtenstein á dögunum, þegar þeir brutu reglur landsliðsins um útivistartíma. Hinir leikmennirnir voru Olof Mellberg, sem síðar baðst afsökunar líkt og Ibrahimovic og verður með gegn Íslendingum - en Christian Wilhelmson er enn úti í kuldanum vegna þessa.