Kona lést í skotárásinni í Kanada

Ein kona týndi lífi og minnst nítján særðust þegar ungur maður hóf skothríð á samnemendur sína í menntaskóla í Montreal í Kanada síðdegis í gær. Byssumaðurinn var felldur af lögreglu.

Að sögn vitna hleypti hann fyrsta skotinu af byssu sinni fyrir utan skólann og gekk síðan inn og hélt skothríðinni áfram. Skelfingarástand skapaðist og nemendur flúðu þegar út úr skólanum.

Árásarmaðurinn hélt inn í matsal skólans þar sem nemendur og starfsfólk kastaði sér á gólfið í skelfingu. Maðurinn miðaði á fólk og hleypti af milli þess sem hann faldi sig bak við sjálfsala og hlóð byssuna. Lögregla kom þegar á vettvang og skaut manninn þegar hann miðaði á lögreglumenn.