Sálin og Gospelkór með stórtónleika

Hljómsveitin Sálin hans Jóns míns blæs til stórtónleika í Laugardalshöllinni föstudaginn 15. september. Þar mun hin lífseiga poppsveit troða upp með fulltingi Gospelkórs Reykjavíkur, auk þess sem sveitinni verða til aðstoðar nokkrir aukahljóðfærarleikarar. Á efnisskránni verða valin lög úr söngvasafni Sálarinnar, en einnig verður frumflutt glænýtt efni úr smiðju Sálverja. Öll lögin verða útsett sérstaklega með hliðsjón af hinum rómaða kór, sem annálaður er fyrir innblástur og kraftmikla túlkun. Þetta verður sannarlega einstakt tækifæri fyrir hina fjölmörgu Sálaráhangendur, sem og unnendur gospel-skotinnar tónlistar, en eftir því sem næst verður

komið, er þetta í fyrsta skipti sem íslensk poppsveit ruglar saman

reytum við fullveðja gospelkór með þessum hætti. Segja má að

tónleikarnir séu óbeint framhald af fyrri "hliðarskrefum" Sálarinnar,

sem hefur á síðustu árum m.a. leikið með Sinfóníuhljómsveit Íslands

og sett upp frumsaminn söngleik.

Höllin verður alsett sætum og miðamagn því nokkuð takmarkað. Miðasala hófst á föstudaginn og gengur vel, en aðeins nokkur hundruð sæti eru

nú óseld. Höllinni verður eins og jafnan skipt niður í tvö svæði, eða verðbil, A-svæði (5.000 kr.) og B-svæði (4.000 kr.). Miðar eru seldir

á stöðvum Esso á Ártúnshöfða og í Fossvogi, í Skífunni, BT og hjá

miða.is. Þetta verður einstakur tónlistarviðburður sem unnendur

íslenskrar popptónlistar skyldu ekki láta fram hjá sér fara.

Engu verður til sparað til að gera tónleikana sem glæsilegasta og

notast verður við fullkomnasta hljóð- og ljósabúnaði sem völ er á

hérlendis. Þeir sem ekki eiga heimangengt þann 15. september geta

huggað sig við það, að tónleikarnir verða hljóð- og myndritaðir, en

stefnt er að útgáfu í nóvember.