Reyndi að aka niður lögregluþjóna

Ökumaður á aflmiklum bíl gerði tilraun til að aka niður tvo lögreglumenn á Neshaga í Reykjavík í nótt. Þeir köstuðu sér frá á síðustu stundu en bíllinn lenti utan í öðrum lögreglumanninum,sem slapp ómeiddur, en við það brotnaði baksýnisspegill af bílnum.

Lögreglumennirnir voru á vettvangi vegna elds, sem komið hafði upp í íbúð í fjölbýlishúsi við götuna og bar bílinn þar að. Þegar ökumaður sá umsvifin á vettvangi, rak hann í afturábak og bakkaði á staur. Þar gaf hann allt í botn áfram og stefndi á lögreglumennina, sem forðuðu sér. Bíllinn fannst síðar í nótt og eigandi hans í framhaldinu, en líklegt er að einhver annar hafi verið á bílnum.

Slökkviliðinu gekk vel að slökkva í mannlausri íbúiðnni, en grunur leikur á að þar hafi verið kveikt í, og er málið rannsakað sem sakamál.