Sarah Croker og Santiago á Rósenberg í kvöld

Sarah Croker heldur tónleika í kvöld á Rósenberg, en spilar svo á Fiskideginum mikla á laugardaginn. Tónleikarnir í kvöld hefjast kl 21:30

Sarah Croker er fædd í Tipperary á Írlandi og ólst þar upp í mikilli músikfjölskyldu. Fyrir nokkrum árum flutti hún til Washington DC í Bandaríkjunum, hvaðan hún kemur með hljómsveit sína hingað. Sarah Croker Band skipa auka hennar þeir Ray Yrure slagverksleikari frá Filippseyjum og hinn norskættaði íslandsvinur Arthur Scott á bassa. Arthur hefur heimsótt landið margoft áður og stundum með hljómsveit í farteskinu - en hann er mörgum íslenskum tónlistarmönnum að góðu kunnur fyrir að greiða götu þeirra í vesturheimi. Sveitinni til halds og trausts verður Frans Gunnarsson gítarleikari (Ensími, Dr. Spock).

Tónlist Sarah Croker er fremur afslöppuð og jafnan byggð í kringum kassagítarinn hennar og söngröddina, en rödd Söruh og túlkun hefur verið líkt við þær mætu söngkonur Sarah McLachlan og Evu Cassidy heitna - sem kom hér við snemma á ferlinum og spilaði á litlu kaffihúsi.

Sarah Croker er nú að fygja eftir nýútkominni plötu sinni, Meet the Day, en á henni eru lög eftir m.a. hana sjálfa, en einnig eru á plötunni tvö lög eftir þá félaga Odd Sigurbjörnssson og Jökul Jörgensen - núverandi og fyrrverandi meðlimi Santiago.

Hljómsveitin Santiago mun einmitt koma fram í fyrsta skipti í langan tíma á tónleikunum á Café Rosenberg ásamt Sarah Croker Band, en Santiago hefur legið undir feldi og unnið að nýju efni síðan um áramót.

Santiago skipa þau Berglind Ósk Guðgeirsdóttir söngkona, Oddur Finnbogi Sigurbjörnsson trommuleikari, Guðmundur Stefán Þorvaldsson rafgítarleikari, Ólafur Haraldsson hljómborðsleikari, Birgir Ólafsson raf- og kassagítarleikari og Jón Kjartan Ingólfsson bassaleikari.

Tónleikar Sarah Croker Band og Santiago á Café Rosenberg í kvöld, en hefjast þeir kl. 21.30.

Sarah Croker Band verður á stóra sviðinu á Fiskidaginn Mikla á Dalvík kl. 13.15 laugardaginn 12. ágúst og mun einnig leika milli 19.30 og 20.30 við Hótel Sóley á Dalvík.