Studdu gjaldþrot Yukos

Meirihluti lánadrottna rússneska olíufyrirtækisins Yukos voru fylgjandi því á fundi þeirra í dag að lýsa fyrirtækið gjaldþrota. Líkur eru á að eignir fyrirtækisins verði seldar upp í gríðarmiklar skuldir Yukos við rússneska ríkið og ríkisolíufyrirtækið Rosneft.

Eigendur Yukos, sem eitt sinn var stærsta olíufyrirtæki heims í einkaeigu, reyndu fram á síðustu stundu að koma í veg fyrir gjaldþrot og fá lánadrottna til að styðja hagræðingu í rekstri fyrirtækisins.

Steven Theede, fyrrum forstjóri fyrirtækisins, sagði starfi sínu lausu í síðustu viku á þeim forsendum að fundur lánadrottnanna væri leiksýning. Hefðu þeir engan áhuga á hagræðingu í rekstri fyrirtæksins og hefði verið fyrirfram ákveðið að fara gjaldþrotaleiðina.

Heildarskuldir Yukos námu jafnvirði tæpra 2.000 milljarða íslenskra króna en eftirstandandi skuldir fyrirtækisins nema nú um 1.200 milljörðum króna.