Fjórir í gæsluvarðhaldi vegna stórs fíkniefnamáls

Lögreglan í Reykjavík rannsakar málið en það var samvinna lögreglunnar og tollgæslunnar sem varð til þess að efnin fundust. Ekki náðist í forsvarsmenn fíkniefnadeildarinnar í Reykjavík í dag. Samkvæmt heimildum er málið trúlega eitt það stæsta sem upp hefur komið á Íslandi til þessa en um er að ræða gífurlegt magn amfetamíns, jafnvel tugi kílóa en eins fannst einhvert magn af hassi. Það að mennirnir fjórir voru úrskurðaðir í þriggja vikna gæsluvarðhald strax við upphaf rannsóknar staðfestir að málið sé stórt. Lögreglan kom að þremur mannanna þar sem þeir voru að tæma fíkniefnin úr bíl í iðnaðarhúsi á Höfðanum í Reykjavík á fimmtudagskvöld en fjórði maðurinn sem situr í gæsluvarðhaldi er eigandi bílsins. Einn mannanna var dæmdur í níu ára fangelsi árið 2000 fyrir þátt sinn í stóra fíknaefnamálinu svokallaða og var hann því á reynslulausn eftir að hann hafði afplánað um helming fangelsisvistarinnar. Þá er einn fjórmenningana þekktastur fyrir að hafa verið framseldur hingað til lands frá Hollandi vegna hvarfs Valgeirs Víðissonar.