Áfall ef McClaren fer frá Middlesbrough

Colin Cooper, fyrrum leikmaður Middlesbrough segir að það yrði gríðarlegt áfall fyrir félagið ef Steve McClaren verður ráðinn til að taka við enska landsliðinu af Sven-Göran Eriksson, en reiknar fastlega með því að forráðamenn Boro séu með varaáætlun ef af því verður.

"Það kæmi mér mikið á óvart ef forráðamenn Boro væru ekki með áætlun í bakhöndinni ef svo færi að McClaren fengi starfið. Það yrði gríðarlegt áfall fyrir félagið ef hann færi, en ég held að allir hérna voni innilega að hann verði hérna áfram á næsta tímabili," sagði Cooper.

McClaren er öllum hnútum kunnugur hjá enska landsliðinu, enda er hann aðstoðarmaður Sven-Göran. Hann hefur þó fram til þessa neitað algerlega að tjá sig um það hvort hann hafi hug á að taka við landsliðinu.