Rooney gæti orðið betri en Ronaldinho

Sir Bobby Charlton, fyrrum leikmaður Manchester United, segir að þó flestir búist við því að Ronaldinho verði maður mótsins á HM í knattspyrnu í Þýskalandi í sumar, eigi hann alveg eins von á því að Wayne Rooney steli senunni ef Englendingum gengur vel á mótinu.

"Þeir eru hvor um sig auðvitað ótrúlegir leikmenn, en Ronaldinho hefur það fram yfir Wayne að hann er reyndari. Rooney er aðeins tvítugur í dag á meðan Ronaldinho er 26 ára, en satt besta að segja kæmi það mér ekkert á óvart þó Rooney yrði orðinn sterkari alhliða leikmaður þegar hann verður á sama aldri og Ronaldinho er á í dag," sagði Charlton sem hefur fylgst með mönnum á borð við Pele og Maradona verða að stórstjörnum í heimsmeistarakeppninni.