Bayern vantar leiðtoga

Fyrrum landsliðsmaðurinn Lothar Matthaus er ekki í vafa um hvað lið Bayern Munchen þarf að gera til að fylla skarð Michael Ballack sem að öllum líkindum gengur í raðir Chelsea í sumar. Matthaus telur að Bayern eigi að leita sér að leiðtoga - ekki hæfileikamanni.

"Ég held að Stilian Petrov hjá Celtic sé maðurinn sem Bayern er að leita að og fylgdist vel með honum þegar ég þjálfaði lið Ungverja. Hann er maður sem spilar með uppbrettar ermar í 90 mínútur og Bayern vantar vinnuhest og leiðtoga á miðjuna - ekki stórstjörnu eins og Michael Ballack. Liðið hefur ekkert unnið í Evrópu síðan hann kom til liðsins. Ég er ekki að segja að ég hafi verið hrifinn af forvera Ballack hjá Bayern, honum Stefan Effenberg - en hann mátti eiga það að hann æsti menn upp og hreif þá með sér," sagði Matthaus og var ekki að skafa af skoðunum sínum frekar en venjulega.